काठमाडौं । स्पेनिस ला लिगाअन्तर्गत रियाल मड्रिडले एल क्लासिकोमा चिर प्रतिद्वन्द्वी बार्सिलोनालाई पराजित गरेको छ ।
सान्टियागो बर्नाबेउमा रियालले बार्सिलोनालाई ३-२ गोलले पराजित गरेको हो । एल क्लासिकोमा दुई टोली ३ पटक आमने सामने हुँदा तिनै पटक रियालले बाजी मार्यो ।
आन्द्रेस क्रिस्टिएनसनले खेलको छैटौं मिनेटमा गोल गर्दै भ्रमण टोली बार्सिलोनालाई सुरुवाती अग्रता दिलाए । तर १८ औँ मिनेटमा भिनिसियस जुनियरले पेनाल्टीमा गोल फर्काएपछि पहिलो हाफ १-१ गोलको बराबरीमा सकियो ।
६९ औँ मिनेटमा फर्मिन लोपेजले गोल गर्दै पुनः बार्सिलोनलाई अग्रता दिलाए । त्यसको ४ मिनेटपछि नै लुकास भाज्क्वेजले रियालका लागि बराबरी गोल फर्काए । ९१ औँ मिनेटमा बेलिङह्यामले निर्णायक गोल गरेपछि रियालले ३-२ को जित हासिल गर्यो । जितपछि रियालले ला लिगाको शीर्ष स्थानमा ११ अङ्कको अग्रता बनाएको छ ।
अब लिगमा ६ खेल मात्र बाँकी छँदा रियालको ३२ खेलबाट ८१ अङ्क छ । दोस्रो स्थानमा रहेको बार्साको समान खेलबाट ७० अङ्क छ । गए रातिनै सम्पन्न अन्य खेलमा एट्लेटिको मड्रिड आलाभेससँग २-० ले पराजित भयो ।
भिल्लारियालले अल्भेरियालाई २-१ ले हराउँदा गेटाफे र रियाल सोसिडाड १-१ गोलको बराबरीमा रोकिए ।
