काठमाडौं । एसीसी प्रिमियर कपको तेस्रो स्थानका लागि भएको खेलमा नेपाल पराजित भएको छ । नेपाललाई हङकङ चार विकेटले पराजित गर्दै तेस्रो स्थान सुरक्षित गर्यो । ओमानको अल अमरेत क्रिकेट मैदानमा टस जितेर ब्याटिङ गरेको नेपालले २० ओभरमा ८ विकेट गुमाएर १ सय ३९ रनको योगफल तयार गरेको थियो ।
१ सय ४० रनको लक्ष्य पच्छ्याएको हङकङले ३ बल बाँकी रहँदा ६ विकेट गुमाएर लक्ष्य पूरा गरेको हो । हङकङका लागि अन्सी राथले नटआउट ६५ रनको योगदान दिए । नेपालका लागि सोमपाल कामीले ३ र दीपेन्द्रसिंह ऐरीले २ विकेट लिए ।
यसअघि पाँचौं ओभरमा ३ विकेट गुमाएर ३२ रनको कमजोर अवस्थामा पुगेको नेपाललाई दीपेन्द्रसिंह ऐरीले मध्यम स्कोरसम्म पुर्याउन ४४ रनको योगदान दिए । सन्दीप जोराले २२ र कप्तान रोहित पौडेलले २१ रन बनाए । यस्तै, सोमपाल कामी १२ र कुशल मल्लले ११ रन बनाए । नेपालका अन्य ब्याट्समेनले दोरहो अंक जोड्न सकेनन् । हङकङका लागि आयुश शुक्लाले सर्वाधिक ३ विकेट लिए ।
