घरेलु फुटबलको शीर्ष डिभिजन लिग जित्ने टोलीले एएफसी कप छनोट खेल्ने अवसर पाउँछन् । मच्छिन्द्र फुटवल क्लबका लागि यो मौका दुई वर्ष अघिनै आएको थियो । २०७६ सालको लिग च्याम्पियन बने पनि मच्छिन्द्रले एएफसी क्लब लाइसेन्स नहुँदा सहभागिता जनाउन पाएन र दोस्रो भएको आर्मी भाग्यमानी बन्यो । यो सिजन भने मच्छिन्द्रले लिग नजित्दै एएफसी कपको प्रारम्भिक चरणमा नेपालको प्रतिनिधित्व गर्दैछ ।
यस पटक एएफसी कप छनोट खेलका लागि टिम दर्ता गरिसक्नुपर्ने मितिमा सहिद स्मारक ए डिभिजन लिगको सातौं चरण मात्र सकिन्थ्यो । त्यसैले अखिल नेपाल फुटवल संघ एन्फाले सातौं चरण सकिँदा शीर्ष स्थानमा रहने टोलीलाई छनोटमा सहभागी गराउने निर्णय गरेको हो । मच्छिन्द्रले कडा चुनौती दिइरहेको मनाङ मर्स्याङ्दी क्लबलाई उछिन्दै यो अवसर पाएको हो । ए डिभिजनमा उक्लिएपछिको ११ वर्षमा मच्छिन्द्रले एएफसी कप छनोट खेल्दैछ । मच्छिन्द्रले, प्रतिस्पर्धा गर्ने दक्षिण एसियाली प्रvतिद्वन्दीको भने टुंगो लाग्न बाँकी छ।
मच्छिन्द्र स्टार खेलाडीले भरिएको टिम भए पनि क्षमता अनुसारको प्रदर्शन गर्न सकिरहेको छैन । लिगका सात मध्ये दुई खेलमा गोल नै गर्न सकेको छैन । हिमालयन शेर्पा विरुद्धको तीन–शून्यको नतिजा नै अहिलेसम्मको फराकिलो जित हो । मच्छिन्द्रले गरेका ९ मध्ये पाँच गोल सेट पिसमा भएको हो । त्यसमा मिडफिल्डर सुनिल बलले गरेका छन् । गोलकिपर विशाल श्रेष्ठले पछिल्ला ६ खेलमा क्लिन सिट राखेका छन् ।
मच्छिन्द्रका कप्तान सुजल श्रेष्ठसहित विशाल श्रेष्ठ, विशाल राई, अभिषेक रिजाल, बुद्ध चेम्जोङ, देवेन्द्र तामाङ, सुनिल बल, रञ्जित र बिजय धिमालसँग एएफसी कप खेलिसकेको अनुभव छ ।
अहिलेसम्म मनाङ, थ्रीस्टार र त्रिभुवन आर्मी क्लब एएफसी कपमा सहभागी भएका छन् । यी क्लबले प्रारम्भिक चरणभन्दा माथिको यात्रा तय गर्न सकेका छैनन् । मच्छिन्द्रले भने नयाँ इतिहास बनाउने अवसरसमेत पाएको छ ।
.png&w=400&height=300)
