काठमाडौं । प्रमुख प्रतिपक्षी नेपाली कांग्रेसले सहकारी ठगी प्रकरणमा संसदीय छानबिन समिति नबनेसम्म संसदका कुनै पनि काम-कारबाही अघि बढ्न नदिने जनाएको छ ।
आजदेखि सुरु भएको प्रतिनिधिसभा बैठकमा नेपाली कांग्रेसका सांसदहरुले नाराबाजी गर्दै विरोध गरेका छन् । कांग्रेस सांसदहरुको विरोधपछि सभामुख देवराज घिमिरेले बैठक १५ मिनेटका लागि स्थगित गर्नु भयो । कांग्रेस सांसद गगन थापाले सरकारले प्रतिपक्षीको प्रश्नलाई दबाउन खोजेको र हेपेको भन्दै आक्रोश पोख्नु भयो । उहाँले संसदीय छानबिनबिना संसद चल्न नदिने अडान राख्नु भयो ।
२ बजे बोलाइएको बैठक दुई घण्टा ढिलो गरेर ४ बजेपछि बसेको थियो । संसद बस्नासाथ कांग्रेसका सांसदहरुले उठेर विरोध जनाएका थिए । लगत्तै सभामुख देवराज घिमिरेले कांग्रेस सांसद गगन थापालाई बोल्न समय दिनु भएको थियो ।