काठमाडौं । सिधाकुरा नामको अनलाइन तथा युट्युबलाई ‘सर्वोच्च अदालतका न्यायाधीश र मिडिया सञ्चालकको मिलेमतोमा भ्रष्टाचार भएको’ फेक अडियो उपलब्ध गराएको आरोप लागेका राजकुमार तिमल्सिनालाई प्रहरी नियन्त्रणमा राख्न सर्वोच्चले आदेश दिएको छ ।
मिडिया सञ्चालक र न्यायाधीशले अख्तियारको 'स्टिङ अपरेसन' सम्बन्धी मुद्दामा भ्रष्टाचार गरेको अडियो फेक भएको भन्दै सिधाकुराका सञ्चालक युवराज कँडेल र कार्यकारी सम्पादक नवीन ढुंगानाविरुद्ध अदालतको अवहेलना मुद्दा चलिरहेको छ ।
सोही क्रममा सञ्चालक कँडेलले उक्त अडियो तिमल्सिनाले उपलब्ध गराएको बायन दिएपछि सर्वोच्चले तिमल्सिनालाई बयानका लागि झिकाउन आदेश दिएको थियो । आइतबार अदालत उपस्थित भएका तिमल्सिनाको बयान नसकिएको भन्दै सर्वोच्चले प्रहरीको जिम्मा लगाउन आदेश दिएको हो । तिमल्सिनाको सोमबार पनि बयान निरन्तर हुने भएको छ ।
त्यस्तै, सिधाकुराका सञ्चालक कँडेल र कार्यकारी सम्पादक ढुंगानालाई पनि सोमबार १० बजे उपस्थित हुन आदेश दिएको छ ।