काठमाडौं । प्रतिनिधिसभाका सांसद तथा कांग्रेस केन्द्रीय सदस्य दीपक खड्काले हडपेको नेपाल स्काउटको जग्गा तथा कार्यालयमा प्रशासनले ताला लगाएर सिलबन्दी गरेको छ । प्रहरीसहित पुगेको प्रशासनको टोलीले लैनचौर बैंक्वेटसहितका भवनमा तालाबन्दी गरेको हो ।
स्काउटको तीन रोपनी जग्गा भाडामा लिएका कांग्रेस सांसद खड्काले थप ९ रोपनी जग्गासमेत हडपेका छन् । स्काउटको सम्पत्ति खाली गर्न अदालतले आदेश दिँदा पनि सरकारले खड्कालाई हटाउन सकेको थिएन ।
सांसद खड्का सञ्चालक रहेको श्री खड्का ल्यान्ड डेभलपमेन्ट प्रालिले स्काउटसँग २०६५ मा सम्झौता गरी ३ रोपनी जग्गा १० वर्षका लागि भाडामा लिएको थियो । सम्झौताको म्याद २०७५ मै सकिए पनि खड्काले सम्झौताअनुसार भाडाबापतको ६ करोड ३० लाख १८ हजार रुपैयाँ भुक्तानी नगरेको स्काउटको दाबी छ । खड्काले भने उक्त जग्गा र भवन अरुलाई भाडामा लगाएका छन् । सांसद खड्काले अनधिकृत रुपमा स्काउटको जग्गा र भवन हडपेको विषयमा कान्तिपुर टेलिभिजनले गत चैत १३ गते नै रिपोर्ट प्रसारण गरेको थियो ।
बिहीबार सहायक प्रमुख जिल्ला अधिकारी हरिप्रसाद शर्मा लैनचौर प्रहरीवृत्तका डीएसपी सत्यनारायण थापा र काठमाडौं महानगरपालिका वडा नम्बर २६का वडा अध्यक्ष श्याम तिवारी लगायतको टोलीले उक्त जग्गाभएको क्षेत्रमा सिलबन्दी गरि नियन्त्रणमा लिएको हो । प्रशासन र प्रहरीको टोली दिउसो नै जग्गा शिल गर्न पुगेपनि खडकाले भाडामा लगाएको लैनचौर ब्यांक्वेटमा विवाहको पार्टी चलिरहेकाले राती ९ बजेपछि मात्रै शिल गरिएको हो । मानविय दृष्टीकोणलाई ध्यानमा राख्दै ब्यांक्वेटमा शुक्रबार हुने पार्टीमा भने कुनै बाधा हुन नदिने सहायक प्रजिअ शर्माले बताएका छन् ।
भाडामा लिएको ३ रोपनी जग्गामा खड्काले लैनचौर ब्यांक्वेट र माई च्वाइस रेस्टुरेन्टलाई भाडामा लगाएका छन् । बैंक्वेट र रेस्टुरेन्टको संरचना ५ रोपनीमा फैलिएको छ । बाँकी करिब ७ रोपनी जग्गामा सशुल्क पार्किङ राखेका छन् ।
लैनचौर चोकको स्काउट भवनको ३६ वटा सटर, कबल पनि खड्काले १५ वर्षदेखि भाडामा लिएका थिए । भाडामा दिएको भवनमा विद्युत् र पानीको महसुलसमेत स्काउटको नाममा उठ्थ्यो ।
सम्बन्धित समाचार...
स्काउटको जग्गामा सांसद दीपक खड्काको रजाइँ, राजनीतिक नेतृत्व मूकदर्शक
