कुनै बेला चौबिसै घण्टा संचालन हुने नेपाल चीन सिमा नाकाको लिपिङ बजार अहिले सुनसान छ । तातोपानी, लिपिङ, खोकुण्डोल र चाकु बजारभन्दा सस्तो मुल्यमा सामान पाउने भएकाले कुनैबेला लिपिङ विभिन्न जिल्लाको प्रमुख व्यापारीक केन्द्र थियो ।
सिन्धुपाल्चोक, दोलाख, काभ्रे, रामेछाप, काठमाण्डौ र भक्तपुर लगायतका मानिस सामान खरिद गर्न तातोपानीको लिपिङ बजार पुग्थे । दशैका लागि सामान किन्नेहरुको घुइँचो हुने र अर्बौको आर्थिक करोबार हुने लिपिङ बजार यसपाली दशैंमा भने सुनसान छ ।
त्यसो त भूकम्पपछि यहाँको व्यवसायिक रौनक हराएको हो । सात वर्षअघिसम्म जिल्लाको चर्को व्यापारिक केन्द्र अहिले भने उराठलाग्दो छ । भुकम्पले क्षतविक्षत भएका घरहरुले यस क्षेत्रको भौगोलिक सुन्दरता पनि गुमेको छ । कुनै बेला निकै चहल पहल हुने लिपिङ बजार अहिले दुर्गम बस्ती झै लाग्छ । ठुलो सहरको रुपमा स्थापित भइसकेको बजार कसरी यो अवस्थामा आयो त ? सात वर्षदेखि कठिनाइ झेल्दै आएका यहाँका बासिन्दाले कुनै न कुनै दिन पुरानै लयमा व्यवसाय फर्किने आशा भने छाडेका छैनन् ।
