निक्षेप बढाउन बैंकहरुबीच ब्याजदर वृद्धिको होड चलेपछि त्यसको मारमा उद्योगी व्यवसायी परेका छन् । बैंकहरुले असोज महिनाका लागि १० प्रतिशतभन्दा माथि आधार दर तोकेका छन् भने साढे ४ प्रतिशत स्प्रेड दर छ । जसले गर्दा बैंकको ब्याज १४ प्रतिशत माथि पुगेको छ ।
नेपाल बैंकर्स संघमा चैतमा भएको भद्र सहमति तोड्दै बैंकहरुले असोजका लागि नयाँ ब्याजदर तोके । अहिले अधिकांस बैंकले मुद्धती निक्षेपमा १२ प्रतिशतभन्दा माथि ब्याज दिने घोषणा गरेका छन् । निक्षेपसँगै कर्जाको व्याज दर पनि स्वतः बढेको छ । अघिकांस बैंकले असोजका लागि आधार दर अर्थात् वेस रेट १० प्रतिशत तोकेका छन् भने स्प्रेड दर साढे ४ प्रतिशत हुादा कर्जाको ब्याज दर साढे १४ प्रतिशत पुगेको छ । बैंक तथा वित्तीय संस्थाले ब्याजदर बढाउँदा साना उद्योगी मारमा परेका छन् ।
निक्षेप तान्नकै लागि बैंकहरु ब्याज दर बढाउने होडमा लागेपछि त्यसको असर समग्र अर्थतन्त्रमै पर्न सक्छ । नेपाल राष्ट्र बैंकले कर्जा विस्तारमा कडाइ गरिरहेका बेला बैंकको ब्याजदर वृद्धि हुँदा अर्थतन्त्र संकुचनतर्फ जाने देखिन्छ ।
पछिल्लो एक वर्षयता वित्तीय क्षेत्रमा तरलता अभाव छ । तरलता व्यवस्थापन गर्न नेपाल राष्ट्र बैंकले गत आर्थिक वर्षमा एक सय खर्ब र चालु आर्थिक वर्षको हालसम्म १६ खर्ब रुपैयाँभन्दा बढी स्थायी तरलता सुविधा प्रदान गरिसकेको छ । तरलता व्यवस्थापन गर्न बैंकहरुले ब्याजदर बढाएको बुझाइ कतिपयको छ ।
गत वर्ष नेपाल राष्ट्र बैंकले एक पटकमा १० प्रतिशतले नबढ्ने गरी ब्याजदर परिवर्तन गर्न सकिने व्यवस्था गरेको थियो । त्यही व्यवस्था बमोजिम बैंकहरुले नयाँ ब्याज दर कायम गरे पनि १२ दशमलव १३ प्रतिशतसम्म पुगेको हो । तर अहिले बैंकहरुले आधार दर नै परिवर्तन गर्दा नयाँ कर्जा लिनेहरुले १४ प्रतिशत तिर्नुपर्ने भएको छ । यसले उत्पादित वस्तुको लागत बढेर मूल्य वृद्धि हुने जोखिम उत्तिकै छ ।