अस्पताल ढिला गरी पुग्ने प्रवृत्तिले कोभिड संक्रमण नियन्त्रणमा चुनौती

श्रावण १९, २०७९

नेपालमा कोभिडको चौथो लहर सुरु भएपछि संक्रमणबाट १७ जनाको मृत्यु भएको छ । अहिले संक्रमण दर २० प्रतिशतको हारारारीमा छ । अस्पताल भर्ना हुने दर बढेको छ । आइसीयुमा मात्रै कोभिडका ४४ जना संक्रमित उपचाररत छन् । संक्रमण बढिरहेको भए पनि ढिलो गरेर मात्र उपचारको दायरामा आउँदा नियन्त्रणमा चुनौती थपिएको छ ।

नेपालमा बिहीबार पीसीआर परीक्षण गराउनेमध्ये १९ दशमलव ०८ प्रतिशतमा संक्रमण देखिएको छ । साउन १ गते संक्रमण दर करिब ८ प्रतिशत मात्रै थियो । साउन १ गते सवैभन्दा बढी काठमाडौं उपत्यकामा ४३ जनामा संक्रमण देखिँदा १९ गते आइपुग्दा ३ सय ५१ जनामा संक्रमण पुष्टी भएको छ । त्यस्तै मोरङमा २७, कास्कीमा २३, सुनसरीमा १७, चितवनमा १२, झापामा १० जनामा संक्रमण देखिएको छ । यता संक्रमण बढेसँगै गम्भीर खालका बिरामी पनि थपिएका छन्। संक्रमण भएर जटिल अवस्थामा पुगेपछि मात्र परीक्षणको दायरामा आउने र अस्पताल ढिला गरी पुग्ने प्रवृत्तिले नियन्त्रणमा चुनौती थपिएको छ ।

कोभिडका सक्रिय संक्रमित बढ्दै गएको अवस्थामा आइसीयु र भेन्टिलेटरमा राख्नुपर्ने बिरामीको संख्या पनि बढ्दै जाने चिकित्सक बताउँछन् । सरकारले पनि त्यही अनुसारको तयारी गरेको दाबी गरेको छ । विगतको तुलनामा पर्याप्त स्रोत–साधन भएकाले उपचारमा समस्या नआउने सरकारको भनाइ छ ।

सरकारले उपचारका लागि स्रोत साधनको कमी नभएको दाबी गरिरहँदा पनि मृत्यु हुने क्रम रोकिएको छैन । अझ पछिल्ला दिनमा त दैनिक एक वा दुई जनाको मृत्यु नै भइरहेको छ । सक्रिय संक्रमितको संख्या ५६ सय कटेको छ । त्यही भएर स्रोत साधन छ भनेर बस्नेभन्दा पनि त्यसको सदुपयोग गरी संक्रमण नियन्त्रणमै केन्द्रीत हुनु आवश्यक छ ।