भारतमा कोभिडको संक्रमण दर बढेको दुई सातापछि नेपालमा पनि संक्रमितको संख्या बढ्ने विगतको अनुभव छ । केहि दिनयता भारतमा संक्रमित दैनिक रुपमा बढ्दै गएका छन् । हाम्रोमा संक्रमण बढ्न नदिन नाकाहरुमा तयारी र बढिहाले अस्पतालमा उपकरण तथा जनशक्तिहरुको अवस्था कस्तो छ ?
स्वास्थ्य मन्त्रालयका अनुसार अहिले नेपालमा १ हजार ८ भेन्टिलेटर छन् । यसैगरी २७ सय ९७ आइसीयु छन् भने एचडियुको संख्या ३८ सय ४६ छ । संक्रमण दर बढ्न सक्ने आसन्न परिस्थितिका लागि तयारी गरिएको दाबी सरकारको छ ।
तर, वास्तविकता भने अर्कै छ । पाल्पा अस्पतालमा तीन करोड रुपैयाँको बजेटमा जडान भएका दुई भेन्टिलेटर र पाँच आइसियु दक्ष जनशक्ति नभएकाले प्रयोगविहीन छन् ।
उता, रुकुम पश्चिमको जिल्ला अस्पतालमा पनि दुई वटा भेन्टिलेटर जनशक्तिकै अभावमा सञ्चालनमा आउन सकेको छैन । अक्सिजन प्लान्ट जडानका लागि असारमा ल्याइएको मेसिन अझै सिलबन्दी गरिएकै अवस्थामा ग्यारेजमा थन्किएको छ ।
उपकरण र जनशक्तिको अभाव त छँदैछ । भारतसँगको सीमा नाकामा सतर्कता पनि अपनाइएको छैन । वीरगन्जको सीमावर्ती रक्सौल बजारबाट हुने निर्वाध आवातजावत कायमै छ । सुदूरपश्चिमकको गौरीफन्टा नाकाबाट दैनिक करिव ४ सय मानिस आउने गरेकोमा आधाको मात्र स्वास्थ्य परीक्षण हुने गरेको छ । बिराटनगरको रानीनाकाबाट आवतजावतमा समेत स्वास्थ्य सतर्कता अपनाइएको छैन ।
भारतमा कोभिड बढ्दै गएकाले नेपालमा पनि बढ्ने सम्भावना छ । अहिलेबाटै सतर्कता नअपनाउने हो भने विगतको जस्तै अवस्था नआउला भन्न सकिँदैन ।
आइसीयु, भेन्टिलेटरलाई पनि सञ्चालन गर्न आवश्यक जनशक्ति अहिलेनै व्यवस्था गर्नुपर्ने छ । हैन भने सामग्री भएर पनि तयारीमा ध्यान नदिँदा यसअघिका लहरमा झैँ संक्रमित अवस्थासँग जुध्न हम्मेहम्मे नहोला भन्न सकिँदैन ।