नेपालमा ५० प्रतिशत महिला अनिच्छित गर्भाधारण गर्न बाध्य

चैत्र १९, २०७८

नेपालमा गर्भाधारण गर्ने महिला मध्ये ५० प्रतिशतले अनिच्छित गर्भाधारण गर्ने गरेको सरकारी तथ्याङ्कले देखाएको छ। महिला सामाजिक र आर्थिक रुपमा सक्षम नहुनु र स्वनिर्णयको अधिकार नपाउँदा अनिच्छित गर्भाधारण बढेको हो ।

नेपालमा बार्षिक १२ लाख गर्भाधारण मध्ये झण्डै आधा अनिच्छित गर्भाधारण हुने गरेको अध्ययनले देखाएको छ। त्यसमा पनि अनिच्छित गर्भाधारणको करिब २ तिहाइ गर्भपतन हुने गरेको छ। प्रजनन उमेरका विवाहित महिलामध्ये लगभग ४३ प्रतिशत मात्र परिवार नियोजनका साधन प्रयोग गर्छन् भने परिवार नियोजनको आवश्यकता भएर पनि सेवा नपाउने महिलाको संख्या २४ प्रतिशत छ । बाँकी ३३ प्रतिशत महिलाले गर्भनिरोधक उपाय अपनाउन नै चाहादैनन्। जसले गर्दा अनिच्छित गर्भाधारण र असुरक्षित गर्भपतनको संख्या उच्च छ ।

नेपाल सरकारको तथ्याङ्कले जम्मा १ लाखको हाराहारीमा बार्षिक गर्भपतन हुने गरेको तथ्याङ्क देखाए पनि, असुरक्षित तवरले बार्षिक ३ लाख भन्दा बढीले गर्भपतन गर्ने गरेका छन् । गर्भानिरोधक साधनको ज्ञान र पहुँचको अभाव र प्रभावकारी ढङ्गले परिवार नियोजनका कार्यक्रम सञ्चालन गर्न नसक्नुले पनि अनिच्छित गर्भाधारण धेरै हुने गरेको छ।

नेपालमा अझै पनि लगभग ४१ प्रतिशत किशोरीको विवाह १८ वर्ष अगावै हुने गरेको छ । किशोरावस्थामा गर्भाधारण गरेका किशोरीहरू मध्ये आधा गर्भाधारण अनिच्छित छ ।  परिवार नियोजनको साधन प्रयोगकर्ता महिलाहरुमध्ये पनि १२ महिनाभित्र आधाले परिवार नियोजनका साधन  प्रयोग गर्न  छोड्ने गरेका छन् ।