राष्ट्रपतिका सल्लाहकार चिरञ्जीवी नेपाललाई पदबाट बर्खास्त गर्न नागरिक अगुवाको माग

काठमाडौं । राष्ट्रपति रामचन्द्र पौडेलका सल्लाहकार चिरञ्जीवी नेपाललाई पदबाट बर्खास्त गर्न नागरिक अगुवाले माग गरेका छन् । पूर्वमन्त्री एवं भारतका लागि नेपाली राजदूत नीलम्बर आचार्य, अख्तियार दुरुपयोग अनुसन्धान आयोगका पूर्व प्रमुख आयुक्त सूर्यनाथ उपाध्याय, राष्ट्रिय मानव अधिकार आयोगका पूर्व आयुक्त सुशील प्याकुरेल र लेखक तथा पत्रकार कनकमणि दीक्षितले बुधबार सामुहिक रूपमा एक विज्ञप्ति जारी गर्दै नेपालाई बर्खास्त गर्न माग गर्नुभएको हो ।  

राष्ट्रपतिका सल्लाहकार नेपालले एक सयको नोटको पुन: मुद्रण गर्दा संविधानमा समावेश नक्सा राख्ने निर्णयप्रति विरोध जनाएको भन्दै तत्काल पदबाट हटाउन विज्ञप्तिमा माग गरिएको छ । 

'चलनचल्तिमा रहेको नेपालको नक्सा अंकित एक सयको नोटको पुन: मुद्रण गर्दा संविधानमा समावेश नक्सा राख्ने निर्णय प्रति राष्ट्रपतिका सल्लाहकार चिरञ्जीवी नेपालले गरेको विरोधप्रति हामी निम्न हस्ताक्षरकर्ता खेद व्यक्त गर्दछौँ,' विज्ञप्तिमा लेखिएको छ, 'मुलुकको हित र स्वाभिमान विरुद्ध र पदीय मर्यादा विपरीत राष्ट्रिय र अन्तराष्ट्रिय सञ्चार माध्यममा प्रतिक्रिया दिदै उनले यस्ता टिप्पणी गरेका छन्। जबकि संविधानको नक्सामा भएको संशोधनलाई लाञ्छित गर्ने र भूमिमाथि आफ्नो दाबी नेपालले त्यागेको अर्थ लाग्ने गरी नोट छाप्ने कुरा भएको भए देशघाती हुन्थ्यो।'

नेपालले सार्वभौमिकताबारे गरेको टिप्पणी अपरिपक्व भएको नागरिक अगुवाको भनाइ छ ।

'सीमा नाघेका यस्ता सार्वजनिक अभिव्यक्तिले संवैधानिक राष्ट्र प्रमुखको पदको गरिमामा चोट पुर्‍याएको छ,' विज्ञप्तिमा उल्लेख छ, 'राष्ट्रपति कार्यालय मौन रहेको अवस्थामा सरकारको निर्णयलाई 'अन्तर्राष्ट्रिय मान्यता विपरीत' र 'अविवेकी' भन्ने सल्लाहकार चिरञ्जीवी नेपालका सार्वजनिक अभिव्यक्ति राष्ट्रपति रामचन्द्र पौडेलकै तर्फबाट आएको भनी हामी बुझ्न बाध्य छौं।'